Fundjava ne Tiranë, rinia “mbytet” në alkol !

**Andi** · nga **Andi** prej 12/3/2008, 11:59 pm

Argëtimi i rinisë nën moton “tapë për një ditë". Pavarësisht çmimeve të larta, porositë ka kohë që nuk bëhen më me gota, por...me shishe. “Gota” kushton sa dita e punës. Femrat preferojnë koktejlin “Moskov”, i cili është më i lehtë.

Nëse dikur fundjava kalohej në aksione vullnetare, sot çdokush mund të habitet me atë se çfarë ndodh gjatë ditëve të pushimit. Mjafton një xhiro nga ish-Blloku pas mesnate, për të kuptuar se sa vështirë është të gjesh një njeri “esëll”. Pavarësisht çmimeve të larta të alkoolit, rinia argëtohet nën moton “tapë për një ditë”. Porositë ka kohë që nuk bëhen më me gota, por...me shishe. Çmimet e pijeve të tilla, siç janë uiski ose koktjle të ndryshme alkoolike, mund të kushtojnë sa një ditë punë e një punëtori të thjeshtë krahu ose e një kamerieri. Ndërsa çmimi i një shishe vere mund të arrijë deri në 25 000 lekë, për një shishe. Gjithsesi, fundjava është ajo që i tërheq më shumë njerëzit t’u drejtohen lokaleve të kësaj zone, për ta harxhuar kohën e pushimit nën avujt e alkoolit.

Çmimet e pijeve në zonën e ish-Bllokut:

Chivas Regal: 500 lekë
Vodka: 300-600 lekë
Xhoni Walker: 300 lekë
Xhin: 200-600 lekë
Verërat: 1 200-25 000 lekë/shishja

As femrat nuk mbeten pas...
Meshkujt pijnë më shumë alkool, por as femrat nuk mbeten pas. Kështu shprehet Luna Çollaku, bankier në lokalin “Planet” në zonën e ish-Bllokut. “Femrat kanë më tepër preferenca për t’i përzier pijet ose, siç i quajmë ndryshe ne banakierët, kokteil,” thotë Çollaku. Sipas tij, çmimi i këtyre lloj pijeve sillet rreth 600 lekë dhe bëhen nga përzierja e disa llojeve të uiskit, vodkës, rumit dhe pijeve me gaz. Ai tregon se koktejli që preferohet më shumë nga djemtë është “Long Island”. “Është një bombë e vërtetë alkoolike, dhe nuk mund të pish më shumë se tre të tilla; përndryshe, bëhesh për spital,” tregon banakieri. Përsa u përket vajzave, ai tregon se ato preferojnë kokteilin “Moskov”, i cili është më i lehtë dhe mund të pihet në sasi më të mëdha. “Çmimet në lokalin tonë i kemi më të lira se në lokalet e tjera, që përfshin zona e ish-Bllokut,” shpjegon Çollaku. Sipas tij, klientët mund të kënaqen duke pirë, duke ditur se janë duke paguar me lirë dhe, në këtë mënyrë, dalin më të kënaqur nga lokali.