Berisha: Kufiri nuk u shit, mateni me kompas

**Sajmiri** · nga **Sajmiri** prej 10/5/2009, 5:15 pm

Kryeministri Berisha vijon ta cilësojë si një “trillim primitiv”, skandalin e dhurimit në favor të Greqisë të 225 km2 sipërfaqe ujore në detin Jon. Nga Belshi i qarkut të Elbasanit, kreu i ekzekutivit deklaroi dje lidhur me këtë çështje se, “edhe nxënësi i klasës së pestë, me kompas, është në gjendje të provojë se ato janë ndarë në bazë të ligjit dhe se nuk ka pasur asnjë milimetër devijim. Kjo është një gjë e turpshme”. Por, përveç këtyre akuzave, Berisha nuk ka qenë në gjendje as dje t’i provojë opinionit publik pretendimin e tij. Pasi, në vend që të bëjë publike hartat dhe distancat konkrete që Shqipëria dhe Greqia kanë nga 150 pikat e vijës së re të kufirit detar, ai thjesht jep argumente pa vlerë. Nga ana tjetër, “Gazeta Shqiptare” me ndihmën e një eksperti topograf ka arritur në konkluzionin se Greqisë i janë dhuruar rreth 225 km2 sipërfaqe ujore. Falë ekspertizës që na është ofruar, ka rezultuar se vija e re e kufirit detar mes dy shteteve ka prirjen për t’u futur në drejtim të Karaburunit, pra në dëm të Shqipërisë, me afërsisht 11 km. “Trekëndëshi” i dhuruar palës greke fillon nga pika 120 e vijës kufitare, deri në pikën fundore të saj me numër 150. Vija, sipas ekspertit, është spostuar në drejtim të ujërave shqiptare me rreth 30 km më tej ose e kthyer në milje detare, me rreth 16 milje. Në rast se ‘GSH’ flet me gjuhën konkrete të shifrave që servir eksperti, Berisha nga ana tjetër flet me gjuhën e nxënësit të klasës së pestë, sikundër bëri dje. Kujtojmë se “Gazeta Shqiptare” ka dy javë që kërkon nga qeveria të bëjë publike hartat dhe distancat konkrete që Shqipëria dhe Greqia kanë nga 150 pikat e vijës së re të kufirit detar që është përcaktuar në marrëveshjen mes qeverive respektive. Përgjigja që na është kthyer nëpërmjet Komandantit të Flotës Detare, Kristaq Gërveni ka qenë e njëjtë; “nuk ka se ç’të duhen ty distancat e hartat. Ne garantojmë baraslargësinë nga të dy brigjet”. Ndaj, Berisha para se të flasë më argumente boshe, duhet të vërë në dispozicion të medias hartën dhe të sqarojë arsyen pse ajo nuk bëhet transparente dhe mbahet e fshehtë për publikun shqiptar.
Heshtja e opozitës
Kryeministri Berisha tentoi dje të zbehë skandalin e dhurimit të ujërave territoriale të shtetit shqiptar, duke pretenduar se kjo çështje ka prapavijë politike, pra është inskenuar nga opozita.
“Opozita vazhdon të pretendojë se kryeministri i dha ujërat shqiptare. Këto ishin trillime primitive”, - tha dje kreu i qeverisë. Ndërkohë, “Gazeta Shqiptare”, përveçse ka denoncuar kryeministrin që i trajton ujërat territoriale, që janë pasuri kombëtare, sikundër të ishin pronat private të tij, ka denoncuar edhe heshtjen e frikshme të opozitës për një çështje kaq madhore. Në disa numra radhazi, ‘GSH’ i është përgjigjur pretendimit të së majtës se, “nuk është njohur me marrëveshjen”, me ftesën për të marrë “një topograf përtej së majtës e së djathtës”, në mënyrë që të bindet nëse në marrëveshjen Basha-Bakojanis, ekziston ose jo skandali i dhurimit të ujërave tona territoriale. E megjithatë, nga Partia Socialiste deri më sot nuk ka asnjë qëndrim institucional për çështjen, veç ndonjë zëri jopërfaqësues.